Mipa leh Eirawngbawl

Rilru a awm hi ziak pawp zel ang!

Kan thiannu chu chhun dar sawm pahnih leh a chanve (12:30 pm) atang a zan dar sawm leh a chanve (10:30 pm) thleng office a kal thin a. A pasal ve thung chu zing dar kua atang a tlai dar nga thleng a kal thung. An nu office hlan chuan an pa chu inah a lo awm veng veng a. Zan dar sawmpakhat ah an nu a rawn haw a. Rawng a bawl chawp a, zan dar khat velah chaw an ei a. Zan lai ah puar peng pawng in an mu thin. An pa khan tlai dar nga atanga zan dar sawmpakhat thleng khan enge a tih ang le! Rawng lo bawl peih diam se an nu pawh kha a lawm ngawt ang!

Ka ngaihdan mawl leh nghet tlut pakhat chu -- Mahni eitur pawh siam thiam loh chuan ei loh mai tur tih hi. Mipa nih vang a eirawngbawl thiam lo emaw in tih tlat hi natna chi khat a ni. Nupuite awm tir mai mai a, pasal ten rawngbawl tur tihna lam a ni lo. A tul hunah chuan mipa te pawh hian rawngbawl te hi thiam taka tih ve mai tur tih lam a ni.

Tlai dar 6 ah office ka ban chang chuan rawng ka lo bawl peih diam a. Zan dar 12 vel a kan nu hnathawk rawn bang tan chuan eitur thiam ang tawk tawk in ka lo siam thin. Hah takin hnathawhna atangin a rawn haw hnu a rawngbawl chawp tir hi a pawimawh fet ah lo chuan a tangkaina ka hre lo. Office ka ban tlai tum a, a ni inah a awm anih chuan a thiam ang tawk a tuihnai eitur a lo buaisaih ve bawk thin. Nuam ve tak a ni! Tin, inah kan awmdun chuan kan pahnihin kan bawl dun chang te pawh a awm. A hlimawm duh phian!

I nupui/bialnu khan i rawngbawl ringawt ei a tum chuan vuak hrep tlak a ni. Mi thatchhe tak ani tihna a ni. Chutih rualin, nupuite hman leh hman loh ngaihtuah lova, mahni'n tih ve theih reng lai a nupuite rawngbawl tur a nghak ngut ngut mi i nih chuan nangmah chu vuak hrep tlak i ni. Tin, chawnghei tlak i ni bawk.

Mizo mipa te hi kan inti PA a, rawngbawl thiamlo nih te hi intihtheihna emaw ti kan awm. Mawlna chi khat a ni. Rawngbawl thiamlo tan chuan midang rin tur awm loh changa chawnghei emaw Hotel a chaw ei chhuah a ni tawp mai a ni.

Phai ah hian thian inluah ho an awm fo. Rawngbawl thiamlo leh thiante rawngbawl sa ei tun tun hi an tam mai. Mahni in bawl ve tum si lo, mahni chaw eina thleng sil peih tawk hi an awm nual. Aizawla celebrity fu, phai a mi chaw thing chang a leng kual duk duk an sawi teh pawh an awm. A zahthlak khawp mai!

Rawngbawl hi a zahthlak loh a, thiam loh pawn zir theih a ni. Tin, uluk taka siam hian thil chu a tui mai. Rawngbawl thiam tak pawhin a uluk loh chuan thil a siam tui thei chuang lo.

Kan nu inrinni ah a lo haw dawn a. Kaikuang kan tui tak nen lo hmuak leh phawt mai ang.